Identifícate aquí ou Rexístrate
Novas
METALICIA VOL.2 XUNTA 26 BANDAS DE NOSO
O metal galego, reunido nunha nova recompilación
28/08/2009O metal de noso reafírmase como comunidade musical unida e con fe no ben común. A rede virtual Metalicia, que agrupa máis dun cento de grupos e 600 membros, vén de lanzar a segunda entrega do disco compilatorio do mesmo nome, con 26 bandas da nosa escena metaleira.
O 'Metalicia Vol.2' acaba de saír do forno, de novo grazas á iniciativa da comunidade virtual Metalicia. Con só un ano de vida, neste espazo danse cita centos de grupos, fans, locais, estudios e festivais para apoiar e promover a actividade metaleira en Galicia. Esta segunda compilación xa está dispoñible para a descarga gratuíta desde a web, e tamén en versión física miniCD-MP3 a prezo de custo: 1 euro. As copias distribuiranse en tendas e locais de metal por todo o territorio galego.
Entre as bandas seleccionadas nesta escolma atópanse varias que contan co seu espazo en Nsaio. É o caso de Masmel, Cadalso, Malasombra, Labazada, Trashnos, For Home Use Only, The Codename -recentes gañadores do Música Xove compostelán na modalidade de metal- e mais os ourensáns Kaleya, que xa tiñan un tema incluído na primeira compilación de setembro de 2008. Outras bandas, como Lady Evil, Lethal Vice, Namek e os incombustibles Talesien tamén repiten na lista de temas que compoñen este volume 2.
'Metalicia Vol.2' volve abranguer unha ampla miscelánea de estilos: as outras bandas que completan a selección son Dharma, Enuma Elis, Hestia, To Nowhere, The Undressed, NightCrawler, Maldia, Lightmaster, Primitive, Id3m, In.Verno, Barbarian Prophecies, Skullkrusher e Freedom Xlave.
Compartir
